Plis ki en santenn paran ki’n swiv bann sesyon ledikasyon paran avan e apre nesans zot baba pandan lannen 2022 e 2023 in resevwar zot sertifika pandan en seremoni kot Lasal Konferans STC, Vandredi le 20 Septanm.Sa bann sesyon inisye par Departman Zafer Sosyal, i en konponan ki sa departman ti enkorpor dan progranm Parenting Education lannen pase.
Pou note ki pwen depar progranm Parenting Education ti an 2013. Okour bann lannen, in pas atraver plizyer transformasyon, amelyorasyon e lazisteman pou pli byen deservi paran.Servis in aprezan ganny desantralize dan bann sant lasante pli lokalize lo Mahe, Praslin e La Digue, osi byen ki dan sant kominoter serten distrik.
Sesyon ledikasyon pou “antenatal and post-delivery parenting” i fer an partenarya avek Minister Lasante atraver bann fanmsaz ki enterakte direkteman avek kordinater e bann fasilitater sa progranm. Progranm i resevwar mazorite partisipan atraver sa bann fanmsaz ki konsilte bann manman dan diferan sant lasante. Pou note, pandan sa dernyen lannen, in annan en logmantasyon dan lakantite papa ki partisip dan progranm.
Pandan seremoni, kordinater bann sesyon, manmzel Gina Laporte osi byen ki bann fasilitater; madanm Philomena Barbe, madanm Marie-Claire Betsy e madanm Lorna Vidot ti ganny rekonpanse pou zot devouman.
Minis pou Lanplwa ek Zafer Sosyal, Mme Patricia Francourt in ankouraz bann paran pou ‘toultan met zot zanfan koman priorite limero 1’.
